মুখ্য পৃষ্ঠা
06/04/2515:04
• ভালপোৱা •
যিদিনা দুখৰ আঙুলিত ধৰি
খোজ দিছিলো বিষাদৰ অৰণ্যত
সেইদিনা পিতাইক সুধিছিলো ,
সময়ৰ আছেনে ইতিহাস ?
আছেনে বুৰঞ্জীত জন্ম-মৃত্যুৰ তাৰিখ ?
পিতাইৰ মৌনতাত সেইদিনা বুজিছিলো ,
কেঁচা মাটিত মুৰৰ ঘাম পৰাৰ বেথা |
নাঙলৰ আঁচোৰত পৃথিৱীয়ে নাকান্দে
কান্দে মাথো আকাশে |
আইৰ বুকুলৈও বৰষুণ আহে
চকুৰ পটাত জিলিকে নিয়ঁৰ
দূৱৰিত সুৰৰ মুৰ্চ্ছনা |
অনুমতিৰ অবিহনেই সেইদিনা
তেওঁৰ প্ৰেমত পৰিলো |
তেওঁৰ বুকুলৈ জোনাক নাহে
নাহে ছিপ ছিপ এজাক বৰষুণ |
তেওঁ ধনীৰ জীয়াৰি...
নুবুজে ভালপোৱা |
বুকুৰ সাতাম পুৰুষিয়া অসুখ মোৰ
এটুপি মদিৰাত কলিজা ডুবাই
সাৰে থাকো উৰে ৰাতি |
তেওঁৰ চাগৈ গভীৰ টোপনি ,
স্বপ্ন দেশত এথুপি হালধীয়া সোণাৰু |
__ৰাজু কলিতা
