মুখ্য পৃষ্ঠা
06/04/2514:43
"শব্দ"
কলমৰ বাৰুদেৰে আখৰৰ গুলী ফুটাই
উকা কাগজত নীলা চিয়াঁহীৰ ৰং নিগৰাই
মোৰ দেশৰ বাবে
এটি বিপ্লৱী শব্দ
এজাক শান্তিৰ বতাহ |
বহু দেশৰ নগৰে চহৰে
ঐক্যৰ মজিয়াত অনৈক্য বন্দী হৈ থাকে |
বিদ্ৰুহৰ সম্ভাৱনাত অৰাজিকতাৰ সংহতি
চ'তৰ সৰা পাতৰ দৰে গচকি ভাঙে |
বিভেদৰ কালিমা আতৰাই
অন্ধবিশ্বাস দূৰ কৰিবলৈ
এটা বিশ্বাসী শব্দ |
ধৰ্মৰ গোড়ামী ,স্বাধীনতাৰ অশান্তি
অথবা ভালপোৱাৰ বুৰঞ্জীত
এটি মিলনৰ শব্দ |
গানৰ কলিলে কলিয়ে
কবিৰ প্ৰাণে প্ৰাণে
অবিৰত কম্পিত হৃদয়ৰ শব্দ |
বিনা মেঘে বৰ্জ্ৰপাত পৰাৰ দৰে
মাতালৰ মুখৰ অশ্লীল শব্দ কাঢ়ি
হ'ব বিচাৰো প্ৰেমৰ শব্দ |
মোৰ দেশৰ বাবে
মোৰ দেশৰ চহা খেতিয়কৰ বাবে
মই সম্ভাৱনাময় শব্দ |
পখীৰ কলৰোল ,বসন্তৰ আবিৰ
শব্দত ধেমালি উজাগৰি ৰাতি |
বাৰুদৰ আৰ্তনাদত শেষ শব্দ ,
ৰু ৰুৱাই জ্বলি উঠা চিতাৰ অলেখ শব্দ |
মই শব্দ হ'ব বিচাৰো ,
প্ৰাণৰো প্ৰাণৰ শব্দ
সেউজীয়া পৃথিৱীৰ মৰমৰ শব্দ |
● ৰাজু কলিতা
12/11/14
