মুখ্য পৃষ্ঠা
06/04/2514:59
• পানী •
(এক)
একাঁজলি পানীত জোনটো ডুবি থাকে
হালধীয়া চাকিৰ পোহৰ পৰিলে
জোনটো শুই পৰে ,
পানীৰো ভাগৰ থাকে
জোনটোয়ে নুবুজে
নৈয়ে নৈয়ে বৈ বৈ
সাগৰৰ বুকুত কান্দে
চকুলোৰে পানী বোৰ নিমখীয়া হৈ পৰে |
(দুই)
ৰং বোৰ সাৱতি পানী দুখী হয়
অসুখীয়া হৃদয় লৈ
কবিয়ে বিচাৰে পানীৰ ৰং
কবিতাৰ পথাৰত চকুলোৰ খৰস্ৰোতা নৈ
পানীৰ পিয়লাত জুই |
(তিনি)
পানীৰ পিয়লাত জীৱনৰ মোহ
সপোনে কুটি কুটি খাই কলিজা
ঘামে ধোৱা দেহত মোৰ
দৰিদ্ৰতাৰ অলেখ আবৰ্জনা ।
(চাৰি)
অষ্টাচলৰ সূৰুযে লুইতত পানী খাই
এটি এটি দিনৰ সমাপ্তি ঘোষনা কৰে ।
পানীতেই মুখ চাই
জোনটো ভাগৰে
তিৰবিৰ তৰাবোৰ পানীত ওপঙে ।
(পাঁচ)
আশাবোৰ একাঁজলি পানীত ডুবাই
শুকুৱাই থৈ দিওঁ বুকুৰ উপত্যকাত |
অনুভৱ বোৰ এলক'হলৰ দৰে ,
চিকুটি চিকুটি চিঙে জীৱনৰ পণ |
দুগালত চকুলোৰ চেকুৰা লাগে
পানী তথাপিও চকুতে থাকে |
___ৰাজু কলিতা
09/02/15
