মুখ্য পৃষ্ঠা
06/04/2515:15
"খিৰিকী"
বন্ধ কোঠাত চিগাৰেটৰ ধোঁৱাৰ
আন্দোলন
হেঁপাহৰ কেনভাছত প্ৰিয়তমাৰ ছবি
তুলিকাৰ দেৱাল বগাই পাৰ হয় চকুলো
বুকুত অনামি বিষ
এন্ধাৰৰ সিপাৰে এগচি মাটিৰ চাকি
খুলি দিলো খিৰিকী ,
বৈ আহিল পোহৰ |
বুকুৰ তামীঘৰত কামিহাঁড়ৰ খিৰিকী
কলিজা বগাই ওলাই বিষাদৰ হুমুনিয়াহ
সপোনে ভাঙে খিৰিকী ,
মোৰ ঠিকনা বুলিবলৈ আছেনো কি ?
দুগালত দুখৰ ৰহন লাগে
চকুলোৰ চিয়াঁহী |
মোৰ উৰুঁখা পজাৰ ইকৰাৰ বেৰত এন্ধাৰ
গ'লে ,
বেৰৰ জলঙাৰে বৈ পৰা জোনাকে
আইতাৰ জুহালত পোহৰৰ মেলা পাতে
হাঁচটিয়ে মুখ মেলি চাই |
ককাদেউতাৰ সাতাম পুৰুষীয়া জোলোঙাত
বন্দী হয় আঁউসি ,
নাম থলো খিৰিকী |
বন্ধ কোঠাত এন্ধাৰৰ সমাধি
পদূলিত এজাক জোনাকীৰ ধেমালি
অদূৰত কুলিৰ বিননি
মাজনিশা দিলেহি বসন্তৰ জাননী
খিৰিকী খুলি দিলো
বৰঘৰত আইৰ উচুপনি
বিহুটি আকৌ পালেহি |
আজি সপোন দেশত মনোমালিন্য হ'ব
মেঘৰ মাদলে বৰ্ষা মাতিব
তা তা থেইয়া......
ৰুণজুন এজাক বৰষুণ সৰিব
আকাশীপথত জোনাকীয়ে নাচিব
খিৰিকী সিপাৰে জোন জ্বলিব
পৃথিৱী সাৰে ৰব
সুখে কিৰিলি পাৰিব |
____ৰাজু কলিতা
