মুখ্য পৃষ্ঠা
06/04/2515:36
"দিবাস্বপ্ন"
আজি ডিব্ৰু চৌখোৱা অৰণ্য পাৰ হৈ
কাজিৰঙাৰ বুকুলৈ,
এজাক বৰষুণ অহাৰ কথা কথা আছিল |
মানাস অৰণ্যৰ সেউজীয়া গছত বহি
ব্যাকুলতাৰে ৰৈ আছিল এজাক
পৰিভ্ৰমী চৰাই |
দেওঁ লগা পোতাশালৰ বুকুত খামুচি
ৰৈ আছিলো মই |
শুভ্ৰ পাখিৰে ৰাজহাঁহ এজনী ,
উৰি আহিছিল আকাশী গংগাৰ বুকুলৈ |
বৰষুণ জাক অহাৰ কথা আছিল
ৰংঘৰৰ বাকৰিলৈ |
তলাতল ঘৰত গোপনে ৰুণজুণ নুপূৰ বজাই
ৰৈ আছিল তেওঁ |
লুইতৰ ভটিয়নি সোঁতত ভাঁহি আহিছিল ,
মিছিং ডেকাৰ ঐনিতমৰ এটি কলি |
আকাশত থোপা থোপে ওলমি ৰৈছিল
কজলা ডাৱৰ |
নীলাকাশত কোনোয়ে যেন সাজিছিল ,
এখনি নন্দণ কানন |
বৰষুণ জাক অহাৰ কথা আছিল
পাগলাদিয়া পাৰে পাৰে জাঁজীৰ পাৰলৈ |
সোঁৱণশিৰীৰ বুকুত অষ্টাচলৰ সূৰুয
নেদেখি
নাওঁ মেলি উজাই আহিছিল গৰখীয়া ডেকা |
মলয়াই দিছিল বৰষুণৰ অহাৰ বতৰা
নাচি উঠিছিল পাল তৰা নাওঁ |
বৰষুণ জাক আহিম বুলিও নাহিল
ভ্ৰুক্ষেপত কঁপিছিল মোৰ দুটি ওঁঠ |
হয়তো তেওঁৰো...
তেজাল দূপৰিয়া এটা পিঠিত বান্ধি
পাৰ হৈ আহিছিলো এখন পৰিতপ্ত
মৰিশালী |
মনাকাশত বেদনাৰ উল্কাপিণ্ড
এবাটি আপঙেৰে কলিজা ধুই
নিশাটি সাৱতি ললো
আৰু তেওঁ সাৰে থাকিল আকাশত তৰা হৈ |
© ৰাজু কলিতা
